2021年1月13日已讀 2 分鐘

帶你遊走歐洲十大聖誕市集(上)

「聖誕市集」由中古時期15世紀已經開始舉辦，宜家仲成為歐洲每年嘅盛會，德國嘅德勒斯登、法國嘅史特拉斯堡就係最有歷史嘅市集！聖誕市集通常會喺露天廣場舉辦，大約十一月下旬就會開始。令人愛不釋手嘅手工藝品、誘人嘅美食、美妙嘅古老聖誕詩歌及音樂會，加埋熱鬧嘅氣氛，絕對係冬日限定體驗！

德國－紐約堡

舉辦期間：11月25日至12月24日

http://www.christkindlesmarkt.de/en/

紐倫堡已經有400年嘅歷史，亦都係歐洲最知名嘅聖誕市集！呢度其實係由幾個小市集組成：兒童市集、姐妹市市集、小食街～兒童市集仲會有旋轉木馬、迷你摩天輪同小火車！當然唔可以錯過當地嘅美食啦！

記得要試下真正嘅德國香腸，再加一杯令你暖笠笠嘅熱紅酒，熱紅酒入面加咗糖、肉桂、薑等調味料，飲起嚟夠晒特別！

法國－史特拉斯堡聖誕市集

舉辦期間：11月25日至12月31日

https://www.pragueexperience.com/events/christmas-markets.asp

史特拉斯堡由15世紀開始就有聖誕市集同燈飾佈置，係法國最古老嘅聖誕市集！「聖誕樹」絕對係市集元老，已經有70歲啦！最熱鬧嘅地方就係「聖母院大教堂」同「布羅格利廣場」四周，由傳統糕點、手工藝品、陶瓷飾品到玩具，應有盡有！有啲攤檔仲會出現史特拉斯堡嘅特殊傳統－個樣幾嚇人嘅「巫婆公仔」，小心嚇親呀～只要從巴黎出發，搭上高鐵（TGV），兩個半小時左右就會去到史特拉斯堡。

奧地利‧薩爾茲堡聖誕市集

舉辦期間：11月19日至12月26日

http://www.salzburg.info/en/art_culture/advent_new_years_eve/advent_christmas_markets/salzburg_christkindlmarkt

薩爾茲堡出名嘅原因，除咗係莫扎特故鄉之外，亦都係聖詩《平安夜》創作嘅發源地～就到聖誕嘅時候，每年都會有數以千計嘅人聚集喺附近嘅Oberndorf教堂，紀念兩位原創作曲家！當地有濃厚嘅聖誕氣氛，期間每日都會舉行聖誕音樂會同傳統市集，當中老城區嘅聖誕市集就最大，唔止裝飾夠華麗、仲有好豐富嘅擺設飾品，被譽為「奧地利最美麗購物中心」～

奧地利－維也納聖誕市集

舉辦期間：11月25日至12月24日

http://www.austria.info/uk/things-to-do/skiing-and-winter/christmas-markets/christmas-markets-in-vienna

維也納聖誕市集會喺市政廳廣場（Rathausplatz）舉辦，每年市政廳大樓鐘樓都會掛上一個電子日曆，為聖誕節倒數～市集入面有超過100間以小木屋為造型嘅攤位，除咗聖誕裝飾次外，亦都有好多唔同種類嘅生活雜貨，仲有地方提供畀小朋友整聖誕曲奇！

最道地嘅行市集方法就係一邊嘆杯暖笠笠又香噴噴嘅果汁熱酒Gluhwein，一邊行市集，諗起都寫意～

捷克－布拉格聖誕市集

舉辦期間：12月3日至1月4日

https://www.pragueexperience.com/events/christmas-markets.asp

市集開放嘅日子比較長，就算聖誕節無去，都可以去參與元旦倒數活動，順便睇堆煙花表演～聖誕巿集主要喺舊城廣場(Old Town Square)同溫徹拉斯廣場(Wenceslas Square) 舉行，市集由一排好可愛嘅小木屋造成，攤位以聖誕燈飾、小飾品為主，大家仲可以搵到好多捷克嘅傳統手工藝品，有啲仲獨具波西米亞風格～