小編今次揀咗撘朝早7點半嘅機去台北！去到都仲係好早，9點幾10點離開機場，再轉搭巴士去西門町嘅酒店放低行李～11點幾12點就正式開始旅程喇～第一件事情係醫肚餓！！！
喺香港已經見到有人介紹呢間「Alice is Coming」嘅餐廳！作為愛麗斯迷嘅我又點會錯過咁好嘅機會呢？！餐廳位於西門町站3號出口附近，行到去嗰度，見到個咁靚嘅入口就知已經到達喇～連門口都花咁多心思去裝修，我相信一定唔會令人失望喇！
小編遲咗一步，冇得坐喺杯入面享受午餐 ☹ 但見到每一個角落都有咁靚嘅佈置，仲唔即刻港女上身？！梗係即係乜都影一餐喇！
menu同枱面嗰張餐桌紙都襯過㗎！店員好主動咁介紹每一款食物～
最後小編就叫咗一個咖哩飯～ (哈哈，其實只係普通嘅味道！)但士多啤梨吐司就幾有驚喜，內裡幾軟熟，而外面就好脆口，真係幾好食！而嗰杯妙妙貓提子梳打汁嘅顏色真係令人好興奮！提子味夠突出，最緊要係影相好靚丫嘛～
食飽就搭捷運出發去淡水喇～去幾多次淡水都一樣會好開心，每次見到咁空曠嘅草地，無邊無際嘅大海，同埋藍色嘅天空，喺度吹吓海風，真係好舒服！
雖然已經好飽，但經過始終想買杯嘢飲㗎嘛～阿姨人好好，同小編傾咗好耐計，又介紹附近有咩買，最緊要係佢話佢都好鐘意去香港！
有人話要好好珍惜仲會寫Postcard畀你嘅人～其實寫postcard嘅人都覺得你好重要先會寫畀你㗎！趁呢度有啲靚postcard，小編梗係要寫畀閨蜜喇！
以前香港仲有瘋薯嘅時候，小編係超鐘意食！！！(宜家嘅年青人知唔知知咩係瘋薯呢？) 可惜香港已經冇晒，要食就要嚟淡水食喇 ☹ 雖然同台北無關係，但都照食啦！酸忌廉味永遠都係最正嘅～～～
然後就搭船仔去咗漁人碼頭！喺船上面真係冇辦法影到相，因為實在太大風又太大浪，搖得好厲害之餘，就係不停望住濺起嘅水花～好彩大家閘窗閘得快，如果唔係就好似玩激流咁㗎喇～
漁人碼頭唔算好大，活動都唔算多，趁嗰日天氣唔錯，坐喺度傾吓計、影吓相、望住個大海、好浪漫咁欣賞日落，實在係好寫意～
見到喵星人媽媽帶喵星人返屋企～好得意啊！望完日落就搭返船出淡水，然後再轉捷運返西門町！
想食間特別啲，又近酒店啲，又平啲嘅餐廳！今次就揀咗西門町嘅「瘋麻辣」！兒食咗個辣雞煲，個辣味實在係唔錯，而啲雞亦都好夠焾！食完之後就係火鍋嘅時間，無限量提供肉類，外面嘅冷櫃亦都有好多食物任你拎添，仲有埋甜品添！計返港幣幾百幾蚊一個，有咁高質素嘅食物，抵哂啦！
日期：2016
媒體：YOUYOUGO ／ LET'S Travo
Comments