今次繼續同大家分享小編嘅台北之旅喇！宜家諗返都記得當日係有幾熱同幾攰呀～
一大早就去咗台北市立動物園（木柵動物園）！嗰度有齊12 個園區，分別有台灣鄉土動物區、沙漠動物區、非洲動物區、亞洲熱帶雨林區等，大家可以去探唔同嘅動物，而小編就最鐘意斑馬！
仲有馬騮仔同樹熊～展板會講解動物嘅習性，都幾有教育意義～一家大細去都幾啱㗎，小朋友一定唔會悶～
其實小編見到好多動物，但因為好曬，所以都冇乜心機不停影相…成個動物園行晒都只少要三個幾鐘，大家可以預時間慢慢行。
行完動物園，就搭捷運去返台北101附近嘅ATT 4 FUN，小編知道有呢個地方只因為想嚟食嘢！因為4樓嘅甜蜜王國有好多嘢食～仲佈置得好靚添！
小編就去咗一間叫「冰果甜心」嘅餐廳～
食咗珍珠奶茶鬆餅！就係因為貪佢有啲怪先食，但整體唔會好甜，而且好鬆軟，都幾好食！仲有荔枝茶都唔會好似香港嗰啲咁甜，有新鮮荔枝味～大家食飽之後可以落去3樓行GU喇！(小編一見GU就衝咗入去買衫喇，完全無影到任何相._. )
行完街就去咗饒河街夜市行吓，其實小編唔鐘意食太多炸嘢，所以都冇買啲乜嘢食～ 加上又未肚餓嘛！
去饒河街夜市其實都只不過想去望望彩虹橋，有人話彩虹橋橋面可以盡情欣賞基隆河嘅夜色，同情人一齊會好浪漫，但小編覺得呢度太黑喇，其實都唔太欣賞到條橋，影相都唔係好靚，唯有影一影下面嘅LOVE留念喇！
小編又再一次喺台北唔係食台北食物喇哈哈！喺一堆堆油炸嘅食物裡面竟然見到樣咁清新小食，係櫻花水信玄餅！淋上香濃嘅黑糖糖漿同熟黃豆粉，一定要相機食先，當然味道都唔差喇～但係…個杯櫻花味嘅飲品就建議大家唔好飲喇 哈哈！因為味道實在唔太吸引，又有少少酸味，女仔應該比較難接受呢個味道…
因為都係未太肚餓，行咗個圈就搭捷運返西門町先。知道50嵐嘅質素唔錯，所以決定買返杯解口渴，珍珠奶茶的確唔錯，奶味同茶味好平均，珍珠好有咬口，呢啲先係正宗台式飲品㗎嘛！
小編其中一樣必食嘅就係王子起司馬鈴薯！呢個時間人唔算太多，唔使等好耐就有得食～一邊排隊，職員會邊派menu，介紹唔同嘅口味。
小編揀咗芝士煙肉味！芝士多到可以浸住個薯仔，食到最尾，芝士都足夠撈埋薯仔食，外層嘅脆脆唔會太厚，唔會有油膩嘅感覺～薯仔軟綿綿，超好味！
食完薯仔，就繼續行吓，見到西瓜牛奶，心諗：真係真心撈得埋㗎咩？！朋友好奇心爆棚，決定要試返杯，飲落味道又真係唔錯，但怪怪地咁，不過可以證實係唔會肚痛嘅XD 相信大家對阿宗麵線都唔陌生～排隊買咗一碗，麵線好香，仲有好多大腸，個湯底亦都夠濃郁，食完就好滿足咁返酒店！
一直都未同大家介紹小編住嘅酒店！呢間叫做「町・記憶旅舍」，原來呢度係用舊樓翻新而成，旅店冇刪除歷史嘅痕跡，反而保留咗唔同嘅舊傢私同古董，展示喺每一個小角落～房間仲有大大幅有關西門町嘅壁畫！
旅舍以復古感為裝修風格，相信係文青入住嘅好選擇之一！每一個地方都可以影到靚相～
旅舍會派一塊拼圖畀入住者，大家可以寫低一啲說話或者畫畫，然後喺check out嘅時候貼喺酒店嘅牆上面！竟然旅舍希望旅客用記憶記住自己的旅程，小編都希望旅舍會記得有香港人入住過，所以藉呢個機會畫咗一啲香港照點，同旅舍職員分享一吓～
日期：2016
媒體：YOUYOUGO ／ LET'S Travo
コメント