去得大阪又點可以唔去黑門市場呢？！黑門市場有「大阪人的廚房」嘅稱號，聽到就知道係有幾多好嘢食喇～只要係大阪「日本橋駅」站落車，就已經喺正隔離，好方便！
小編比較早去到，所以唔算好多人。成個市場唔算太大，主要嘅食店都集中喺中間位置，大部分都係食海鮮、刺身，當然仲有其他小食啦～大家可以行個圈望吓有咩食，之後先決定，如果唔係行到一半已經飽咗！
黑門三平係人氣第一嘅刺身店，刺身海產嘅種類好多，價格亦都比較便宜，入面坐滿晒遊客，係有少少逼，但係佢嘅刺身實在係好新鮮～
“It is Ok to eat here!” 即開即食海膽，實在太大誘惑啦！但係九個人一齊去，一人一隻又好似太貴，所以…
所以我哋就買一板海膽share～唔食太飽都啱㗎，因為仲有大把嘢食等緊我！香港嘅海膽同黑門市場嘅海膽真係冇得比，又新鮮又甜，喺香港有99%機會係…食唔返…
日本嘅生果出名好食，香港人平時要畀幾百蚊先食到日本高級生果，但係喺黑門市場就可以用平價買到當季嘅新鮮生果！除咗大家最愛嘅士多啤梨，仲有好多生果都好值得試吓㗎，例如哈密瓜、蘋果、西瓜等！
如果你係抹荼控，小編相信你一見到抹荼蕨餅就會二話不說食左先講～點解得咁遠距離嘅相，哈哈 因為小編就係抹荼控！一打開就掛住食，結果無影相～蕨餅嘅口感有啲似麻糬，係麻糬，唔係麻糬波～質感好軟身，加上黃豆粉或者抹荼粉，好濃味！另外，會提供一包黑蜜或者抺茶蜜，味道幾清甜～值得一試！
除咗抹荼蕨餅，小編仲食埋放喺隔離嘅草莓大福，每個都係獨立包裝，見到都已經流口水～草莓大福中間係用白豆沙整成，甜甜地，配合少少酸嘅原粒士多啤梨，好食！
大家對「豆腐の匠・高橋」應該唔會陌生，係遊客一定會飲嘅超濃豆漿店，可以選擇杯裝或樽裝，小編就要咗樽裝，貪個樽好有特色又好大，一飲落去就感受到又濃又香嘅豆味，鐘意豆漿嘅一定要試吓～
食食吓甜嘢又食返個熱食先～見到呢款燒帶子就忍唔住好想食！每一粒都超級大粒，好鮮甜，再加埋醬汁，正呀～
臨走前買杯雪糕做總結～話明抹荼控，梗係食抹荼雪糕喇！喺日本食抹荼雪糕有濃濃嘅抹荼味係基本嘅～當然仲有濃濃嘅奶味喇，而且仲好滑！但最特別嘅地方其實係部雪糕機，呢部好似扭蛋機嘅白色機就係雪糕機喇～老闆會先雪硬咗雪糕，雪到又圓又扁，到客人揀左味道，就會放該味道嘅雪糕入部機，然後慢慢唧出黎～香港真係無見過咁樣嘅製作方法！
後記
其實一次食唔哂咁多嘢，有機會一定要再黎多次！
黑門市場
地址：〒542-0073 大阪府大阪市中央日本橋２丁目４-１
電話：06-6633-9559
營業時間：9:00 ~ 17:00
交通：地鐵日本橋站10號出口
日期：2016
媒體：YOUYOUGO ／ LET'S Travo
Comments